Ота-онанинг мантиқли мулоҳазалари фарзанд маънавий тарбиясида енгилмас куч эканлигини ҳис этмоқдаман. Тинглаганингда энсангни қотирадиган ва фикрлай бошлаганинг сари этингни жунбушга келтирадиган мантиқий топишмоқлар ўйини. Сизга ҳам ўша топишмоқлардан бирини илиндим. "Ундай инсонларни кўчада ит қопмайди, хонадонига ўғри тушмайди, ҳатто қаримайди"...
Очиғи, йўл бекатлари, кўп қаватли уйлар атрофида уюм-уюм тўпланган ахлатларга кўзимиз кўп тушади-ю, бироқ бир қарашда боши қорайиб, кети сарғайган ожизгина "ўлим аскарлари" — тамаки қолдиғининг инсоният бошига мислсиз касофатларни ёғдираётганлиги ҳақида ўйлаб ҳам кўрмаймиз. Оёғингиз остидаги бир дона "ўлим найзаси" қолдиғидан ҳам кўп нарсани англаб олса бўлади. Айтайлик, чувалчанг ўлчамидаги тамакини "шимиб" туриш учун ўртача уч дақиқа кифоя қилади. Жаҳон статистикаси бўйича "саратон сурнайчаси" ҳар олти сонияда битта инсонга ўлим куйини чалиб беради. Буёғини ҳисоблаймиз. Демак, оёғимиз остидаги биз эътибор бермайдиган бир дона сигарет ҳар олти сонияда — 1, бир дақиқада — 10, кашанда уни сўриб бўлгунча — 30, бир соатда — 600, бир суткада — 14400, бир йилда — 5,4 миллион нафар, яъни Эстония, Қатар, Баҳрайн, Латвиядек давлатлар аҳолисига тенг инсониятни ер юзидан юлиб ташлайди.
Хўш, Ўзбекистон ва жаҳонда бундай фожиалар илдизини қуритиш ҳамда жамиятда соғлом муҳитни барқарорлаштириш борасида қандай чоралар кўрилмоқда?
Маълумки, 2003 йили "Жаҳон соғлиқни сақлаш ташкилотининг тамакига қарши курашиш бўйича "Ҳадли конвенцияси" қабул қилинди. 2002 йилдан буён Ўзбекистон ҳам мазкур Конвенциянинг 174 давлат сингари ижрочиси ҳисобланади. Айнан ушбу Конвенциянинг кўплаб қоидалари Ўзбекистон Республикасининг "Реклама тўғрисида"ги (1998 йил қабул қилинган, 2002 ва 2008 йиллар қўшимча ва ўзгартишлар киритилган), "Алкоголь ва тамаки маҳсулотларининг тарқатилиши ҳамда истеъмол қилинишини чеклаш тўғрисида"ги (2011 йил) миллий қонунларимиз ҳамда Ўзбекистон Республикаси Жиноят ва Маъмурий жавобгарлик тўғрисидаги кодексларида ўз ифодасини топган.
Шундан келиб чиққан ҳолда юртимизда тамаки маҳсулотлари рекламаси мутлақо таъқиқланган. Иш жойларида, соғлиқни сақлаш, таълим, спорт-соғломлаштириш муассасаларида, ёнғин чиқиш хавфи бўлган нуқталарда, жамоат жойларида, жамоат транспортининг барча турларида тамаки маҳсулотлари истеъмоли ман қилинган.Қолаверса, 20 ёшга тўлмаганларга уни сотиш мумкин эмас. Тамаки сотувчи савдо объектлари таълим, спорт ва диний муассасалардан камида 500 метр узоқликда жойлашиши зарур.
Айтайлик, Россияда таълим ва даволаш муассасалари, жамоат транспорти ҳамда стадионларда чекиш қонун йўли билан таъқиқланган. Италияда ҳам жамоат жойларида чеккан кишига жарима миқдори 250 евродан 2000 еврогача белгиланган. Япония, Малайзия, Туркиянинг айрим жойларида чекмайдиганларга мукофот бериш, уни ташлаганларга имтиёзли кредитлар ажратиш жорий қилинган. Туркиянинг қишлоқларидан бирида амал қилаётган маҳаллий таомилга кўра, катталар кичикларга ибрат бўлишлари учун чекмаслиги шарт. Агар у қоидани бузса, қишлоқдаги камбағал оилага бир қоп ун ёки шакар олиб бериши талаб қилинади. Бутан қироллигида тамаки савдоси ман қилинган. Тамаки маҳсулоти сотуви билан шуғулланган фуқарога 225 доллар миқдорида жарима солинади. Ҳолбуки, Бутан қироллигида ўртача иш ҳақи 16 доллардан ошмайди.
Афсуски, юртимизда соғлом турмуш тарзини қарор топтириш, ёшларни жисмонан ва ақлан салоҳиятли юрт посбонлари қилиб тарбиялаш йўлида эзгу ислоҳотлар амалга оширилаётганига қарамасдан ҳалигача баъзи оғриқли нуқталаримиз тузалмасдан қолмоқда. Туркияда ота-она ёшларга ибрат бўлиш мақсадида чекмай турган бир пайтда айрим ота-оналарнинг вояга етмаган фарзандини носвой ёки тамаки учун кўчага юбораётганлиги, Япония, Малайзия каби давлатларда чекмайдиган инсонлар рағбатлантирилаётган бир пайтда, ўғли, набираси тенгги мактаб болаларини 500 метр радиусда тамаки билан бемалол "сийлаётган" меҳрибон бувижонларнинг бизнес фаолиятлари, энг ачинарлиси, ўқувчилар атрофида баъзи тарғиботчилар томонидан "Биз тамаки чекишга қаршимиз" давра суҳбатлари таассуротлари "тамаки" воситасида муҳокама этилаётганлиги оқибатида акстарғибот қилинаётганлиги бу масалага янгича танқидий нигоҳ билан ёндашишимизни англатади.
Бу ҳали ҳаммаси эмас. Республика Саломатлик ва тиббий статистика институти маълумотларига кўра, Ўзбекистонда ҳар йили 30 мингга яқин киши айнан чекиш билан боғлиқ касалликлар туфайли ҳаётдан кўз юмаётганлиги, 2020 йилга бориб эса бу рақам икки бараварга ортиши мумкинлиги ҳақидаги аянчли рақамлар барчамиздан ё бугун Аллоҳ мукаррам қилган танамизни покиза вужуд ёки қовжираган жасадга айлантириш, тишларимизнинг занглаган тунука, оғиз бўшлиғининг эса таърифи йўқ "мушки анбар" ифори таратадиган ахлат қутисига айлантиришни таклиф этмоқда.
Умр — бамисоли чопиб кетаётган кийик соясида бир лаҳза ҳордиқ чиқаришдек оний фурсат. Шундай мусаффо осмонга фарзанду жигарбандларимиз бахтини тилаб, қулоқларимизга тамаки ўрнига жаннат неъмати бўлган райҳоннинг бир новдасини қўндириб, атроф-муҳитни ифлослантирувчи қувур эмас, балки юзидан нур ёғиладиган инсондек яшасак танамиз яйрайди, руҳимиз енгиллашади. Тамакининг фильтрини тортавериб йўқолган кулгичларимиз ажин деворларини емириб яна ёруғликка чиқади. Шунда ёру-дўстлар билан ўтирганда "Вой, қаердандир ахлат ҳиди келяптими?" дея берилган саволга биздек кашандани назарда тутиб "Йўқ, ҳеч қанақа ахлат ҳиди келмаяпти, шунчаки фалончи эснаб қўйди" каби кесатиқлар қилишмайди. Шундагина, она бешикдаги норасида гўдак учун заҳарли пашша-чивиндан кўра, балконда лабларини осмонга чўқчайтирганча мусаффо осмонни булғаётган отаси хатарли эканлигини англаб етади. Энг асосийси, дунёга машҳур тамаки рекламаси рамзи ковбойча шляпа кийган Даррелл Хью Уинфилднинг аянчли тақдири барчамизга сабоқ бўлади. Айнан тамаки рекламасидаги ковбойча шляпаси орқали машҳур бўлган Даррелл Хью Уинфилд ўпка саратонига чалингач тамаки компаниясини судга беради. Минг афсуски, ундирилган миллионлар кашандани сақлаб қололмайди. Ким билади, қариганда компанияни эмас, ёшлигида нафсини судга бериб, тўғри йўлни топганида эди, эллик етти ёшли бу шоввознинг устидан ҳаёт бунчалик кулмасди. Ҳаётининг охири хор бўлмасди.
Мақола бошида топишмоқнинг жавобини омонат қолдирган эдик. Унинг жавоби шуки, кўчада соғлигидан айрилгач ҳассага суяниб қолган одамни ит қопмайди. Чунки ит таёқдан қўрқади. Бемаҳал тунда чекувчи одамнинг уйига ўғри тушмайди. Чунки, туни бўйи нафас етишмасдан қон йўталган кашанданинг хунук ўкириги ўғрининг хотиржамлигини бузади. Тамаки тутунидан паровоз тутуни-ю, оқ булутчалар ясаётган кашанданинг тишлари сарғайиб, тамаки ўсимлигидек қовжираган одам қаримайди. Чунки у нуроний инсонлардек кексайиш ёшигача етиб бормайди.
Жонибек ШУҲРАТОВ,
ФЖШМҚМИ Навоий ҳудудий бўлинмаси етакчи мутахассиси.