Ҳаётдаги энг буюк ва энг кичик воқеаларни, одамларнинг ғалаба ва мағлубиятларини, сўзлари ва сўзга айланмаган орзу-умидларини, табассум ва нигоҳларини вақт шамоли қаёққадир учириб, ўчириб олиб кетаверади. Наҳотки буларнинг бари бир марта юз берса-ю, йўқликка маҳкум бўлса?! Ҳар саҳар қуёш тонгнинг оппоқ рўмолига ўраниб чиқиши, қишлоғига сув келтириш учун ариқ қазиётган кишининг пешонасидан тонг этагига томаётган тер томчилари, тонг бешигида дунёга келган чақалоқ йиғиси, тонг қоронғисида тандирдан ланғиллаб ўрлаган оловнинг нон билан суҳбатлари, севишган қалбларнинг дил розларини тонг даргоҳига олиб учаётган қалдирғочлар парвози, кафтларига тонгни тўлдириб, эл-юртга тинчлик ва омонлик сўраётган қарияларнинг дуолари... — йиллар, асрлар давомида ҳар тонг юз берадиган бу мўъжизаларни вақт чангалидан юлиб қолиш, қайта ҳаёт бағишлаш учун дунёга келган қавм бор.
Рассомлар, мусиқачилар, шоирлар, ёзувчилардан иборат ижод аҳли, деб аталмиш ушбу қавм сафида "Қизилтепа тонги"нинг яратувчилари ҳам бор. Улар мана, 80 йилдирки,Қизилтепа деб аталмиш юрт одамлари ҳаётини, завқ ва ташвишларини вақт шамолининг қўлидан юлиб олиб, абадиятга муҳрлаш, қайта ҳаёт баҚишлаш билан шуғулланадилар.
Ёшлигимда бир кун келиб мен ҳам шуларнинг сафига кираман, вақтдан лаҳзаларни узиб олиб, сўзга айлантириш сабоқларини оламан, деб ўйламагандим. Ўн икки ёшларда эдим чамаси, бизга рус тилидан Даврон Баҳронов, деган янги ўқитувчи келди. Доим кулиб турадиган, болаларни ҳам сизлаб, оҳиста оҳангда гапирадиган бу ўқитувчи адабиётга қизиқишимни сезибми, бир куни "Мактабда бўладиган тадбирларни ёзиб беринг, газетада чиқарамиз", деди. Газетада! Бу мен ишонадиган нарса эмас эди. Китоб ёзадиган, газета-журнал чиқарадиганлар мен учун ўзга олам вакилларидай туюларди. Гарчи ўзим ўша пайтда бадиий китобга, уйимизга келадиган газета-журналларни ўқишга муккасидан кетган бўлсам-да, ўзим ҳам шеърлар, кичик ҳикоялар машқ қилиб юрсам-да, газетага ёзиш ёки газетада чиқиш хаёлимга ҳам келмаганди. Дафтардан йиртиб олинган бир вараққа мактабимизда ўтказилган қайсидир байрам тадбири, унда фаол иштирок этган ўқувчилар ҳақида хабар ёзиб, ўқитувчимизнинг қўлига бердим. Орадан бир кун ўтиб, Даврон ака "Қизил тонг"нинг янги сонини қўлимга тутқазди. Унинг тўртинчи саҳифасида менинг хабарим босилган, остига кимлигим ёзилган эди. Менинг ҳайрат ва ҳаяжонимни англаш учун ўша пайтдаги менинг ёшимда бўлиш керак. Исм-фамилиямнинг босма ҳарфларда ёзилганини биринчи марта кўриб туришим эди. Баъзи жумлалар келишмаган бўлса-да, бирорта сўз тузатилмаганди. Менда ўз-ўзимга ишонч пайдо қилиш учун атайлаб таҳрир қилинмаганини кейинчалик англаб етдим. Ўша лаҳзаларда ҳақиқатан ҳам менга қаердандир куч ёғилиб келгандай бўлди ва бирдан кўз ўнгимдаги олам кенгайгандай, "ёзиш мумкин-ку", деган дарвоза очилиб, бутун ҳаёт мавзулардан иборатдай туюлди. Синфдошларимнинг менга ҳаваси келгани, директоримизнинг мени мақтагани, ота-онамнинг хурсанд бўлгани — булар катта воқеалар бўлса-да, энг асосийси эмас эди. Энг асосийси — хабарда тилга олинган байрам тадбири ҳар гал ўқиганда ҳозир бўлаётгандай қайта кўз ўнгимда такрорланиши, ўша лаҳзалар, ўша руҳият, одамларнинг ўша пайтдаги қиёфаларининг қайта жонланиши эди.
Сўнгра хабарларим, кичик-кичик мақолаларим газетада мунтазам чиқа бошлади. Лекин мен таҳририятга бирор марта ҳам бормаган, рус тили фани ўқитувчимиздан ташқари газетанинг бирор бир ходими билан юзма-юз бўлмаган эдим. Бир куни Даврон ака: "Бугун дарсдан кейин редакцияга борамиз, сизни чақиришаяпти", деб қолди. Ўша пайтдаги Бухоро-Тошкент трассасининг туманимиздаги базалар ва қурилиш ташкилотлари жойлашган чўлга туташ қисми "Қизил тонг" кўчаси, деб аталарди. Шу кўчанинг охирроғидаги кўримсизгина бўлса-да, яхшилаб оқланган бир қаватли бинога кириб бордик. "Нималарни сўрашади, қандай саволлар беришади?" деган ўйлар миямда чарх урар, адабиёту тарихга доир билганларимни хаёлимдан ўтказишга уринар, аммо ҳеч нарсани эслай олмасдим. Оғзим қуриб, тилим танглайимга ёпишиб қолганини, қўлларим бироз титрай бошлаганини сездим. Узун, нимқоронғи даҳлизнинг икки томонидаги кўк эшиклардаги ёзувлар, эски бўлса-да, полнинг ялтиллатиб ювилгани ва газетанинг сирли ҳиди (у пайтда бу ҳиднинг кейинчалик менга қадрдон бўлиб қолган босмахона бўёғи ҳиди эканлигини билмасдим), қайсидир хонада тинмай чиқиллаётган ёзув машинкасининг овози ҳамда жуда ҳам салобатли ва улуғвор янграйдиган "редакция" деган номнинг ваҳимаси мени тамоман гангитиб ташлаган эди. Даҳлиз охиридаги ўнгдаги катта хонага кирдик. Иккита бўёқлари кўчган деразанинг ярмигача ўша замоннинг урфи бўйича оқ сурп парда тортилган, қолган ярмидан кўк рангга бўялган қалин сим панжара кўриниб турарди. Хонанинг ўнг бурчагидаги стол ёнида бўйи узун, сийрак сочлари бир томонга қўл билан таралган киши сирланган оқ кружкани кўтариб сув ичаётганди. Биз киришимиз билан кружкани чап қўлига олди-да, "Э-э, келсинлар", деганча катта-катта қадамлар билан юриб келиб, Даврон акага қўл узатди. Ўқитувчимиз: "Бу киши Пўлат Мурод. Қишлоқ хўжалиги бўлимимизнинг бошлиғи", деб таништирдилар. Пўлат ака гўё ҳозир бир қизиқ гапми, латифами айтмоқчи бўлгандай қиёфада, юзлари ёришиб, кулиб турарди. Салом, деган овозим ичимда қолиб кетди, кўришдик. "Қишлоқ хўжалиги бўлими" деган сўздан ўзимиз пахта теришга, яганага борган пахтазорлар, боғлар ва тутзорлар, далада кетмон ураётган одамлар, юз-кўзига рўмолини чирмаб олган сут соғувчилар, сурув-сурув қўйлар кўз ўнгимга келди ва "бошлиғи" деган сўздан бу кишини шуларнинг ҳаммасининг бошлиғи, деб тушундим ва бироз ҳайратга тушдим. Бошлиқ деганда галстук таққан, қорни катта, ҳеч қачон кулмайдиган, нимагадир ҳамма ундан қўрқадиган одамларни тушунардим. Қаршимдаги юзлари кулиб турган Пўлат Мурод эса бу тасаввурларимга мос келмасди. Хонанинг чап бурчагидаги столда нималарнидир ёзиб ўтирган аёлни "Бу опангиз — Сабоҳат Тўхтаева, маданият бўлимимиз бошлиғи", деб таништирди. Энди "бошлиқ" деган сўздан унча таъсирланмадим, чунки Сабоҳат опани икки-уч бор мактабимизга, маҳалламизга келганини кўргандим, мақолаларини ҳам ўқиганман. Қолаверса, маданият бўлими деганда ўша пайтда фақат туман маданият уйини тушунардим холос. Байрамларда концерт қўядиган туман маданият уйи санъаткорларига Сабоҳат опанинг бошлиқ эмаслигига фаҳмим етарди. "Бу акангиз — Баҳодир Эгамов, ёзган шеър, ҳикояларингизни шу кишига келтирасиз", деб хонанинг кираверишдаги столда, хатларга кўмилиб ўтирган, ориққина, кўкиш кўзларида жиддийлик акс этган, оқ-сариқ юзларида самимият балқиб турган кишини кўрсатди. Шу пайт ташқаридан келиб тўхтаган машинанинг овози эшитилди. "Домла келдилар", деди кимдир.Ҳамма жим бўлиб қолди. Даҳлиздан бир-бир ташланган сокин қадам товушлари биз турган хона томон яқинлашиб келарди. Домла дейишгандаёқ, мен газетанинг бош муҳаррири Мурод Халил эканлигини англагандим. Мурод Халил деган шоирнинг номи туманимиздагина эмас, вилоятда ҳам машҳур эди. Мен у кишининг шеърлари билан ўша пайтда тузук-қуруқ таниш бўлмасам-да, обрў-эътибори, тўғрисўзлиги ҳақида гап-сўзларни кўп эшитардим. Эшикдан узун бўйли, ҳорғинлик соя солган юзларида самимийлик ва меҳр товланиб турган киши кириб келди. Ҳамма ўрнидан турди. Ҳаяжондан кафтларим терлаб кетганди. Домла бошқалар билан эрталаб кўришган шекилли, фақат ўқитувчим билан саломлашди ва тил-забонини йўқотган менга қўл узатди-да: "Давронбой, бизнинг мухбиримиз шу йигитми?" деб сўради. "Нима деди — бизнинг мухбиримиз?!" Оёғим остидан ер йўқолиб қолгандай бўлди. Бу сўз мени кўчада тўп тепишиб юрган тенгдошларимдан ажратиб олиб, бир лаҳзада улғайтириб қўйгандай эди. Кимсан, фалон киши "мухбиримиз" деди, айниқса, "миз" қўшимчасининг борлиги мени шу қавм сафига кирганимнинг тасдиғидай, ҳатто шундай даргоҳга ишга қабул қилингандай туюлди. Мен бахтиёр ва масрур эдим. Сўнгра домла "Қани, келингчи", деб кабинетига олиб кирди ва биз узоқ суҳбатлашдик. Ота-онам кимлиги, нима қилиши, қандай китоблар ўқишимни сўради. Газетага нималар ҳақида, қанақа қилиб ёзиш ҳақида маслаҳатлар берди. "Хоҳлаган пайт келаверинг", деди. Менга "Қизил тонг" деган янги дунёнинг эшиги очилган эди.
1984 йил ўқишни битириб келганимда газетада Раҳим Мақсудов бош муҳаррир эди. Дастлаб Раҳим аканинг туманимиздан чиққан машҳур адабиётшунос олим ТожиҚораевнинг укаси эканлиги у кишига нисбатан алоҳида эҳтиром уйғотган бўлса, ишнинг биринчи кунларидан бошлабоқ асли касби математик бўлган бу кишининг журналистика соҳасини миридан-сиригача билиши, ёшларга муносабати, материалларга ўзгача масъулият билан қараши мени ҳайратга солди. Булар университетлар ўргатмайдиган, фақат ҳаётий тажрибалар туфайли ўзлаштириладиган журналистик сабоқлар эди.
Азиз САИД.