ижтимоий-сиёсий,адабий-бадиий,маданий-маърифий сайти

 

Баҳодир Чориев Ош маросимини ўтказишнинг антиқа усулини топибди. Эндиликда Ош маросими кўча-куйда ўтказилмайди. Одамларга қулай бўлиши учун Ошни интернетда оммавий рассилка қилиш йўлга қўйилган. ,,Стандарт Ош"да бир товоқ ош, иккита кулча, бир ликопча салат бўлса, ,,VIP Ош"да турли ичимликларни танлаш имкони бор. ,,Стандарт Ош"ни бир кунда фақат бир марта буюртма қилиш мумкин.

 

Фарҳод Мухторов яқинда ИИВ ЎзРнинг чақирувини рад қилганмиш. Сабаби йўлкира масалаларини келиша олмаётган экан.

 

Холдор Вулқоннинг  ёзган шеъри Мирзиёевга унаганмиш. Айтишларича Мирзиёев яна, яна деб ётганмиш. Лекин Холдор Вулқонга  ,,не тот" картага тикмасликни маслаҳат берамиз. Ҳарҳолда Гугушага атаб ижод қилса куйиб қолмайди.

 

Сичқон сиғмас инига ,ғалвир боғлар думига дегандек, Максим Назир сайт очганди. Бирор ўн кунлар сайтни юргизиб турди. Ўнгу-сўлдаги кимсаларни қопаверганидан ,ҳозир тиш оғриққа учраб, иситма қилиб ётганмиш.

 

Мистер Қалампир деган кимса ҳам ғалвирни думига боғлаганлардан экан. Анчагина мухлис орттирган чоғда Намоз Нормўминнинг қарғишига учраб, дом дараксиз кетди...

 

Абдурайим Пўлатов таҳририятимизга қўнғироқ қилиб, бундан кейин ҳеч кимни сўкмасликка ва  ўзбекларни ,,қорамол " демасликка ваъда берди. Аввал кимнинг кўнглини оғритган бўлса, барчасидан матбуот орқали кечирим сўрамоқчи. Биз бундан хурсанд бўлдик, албатта. Лекин Пўлатовнинг ҳазилкашроқ эканини эътиборга олиш керак...

 

Исмат Хушев... устози Абдулло Ориповнинг тагига сув қуйиш кампаниясини бошлаган шекилли... ,,Сиз менинг денгизимсиз,Ислом ака" шеърини қайта қайта сайтга қўявериб, ўқувчиларнинг кўнглини айнитаётганмиш.

 

Юсуф Жума яна хавф остида! Нозиккўнгил Муҳаммад Солиҳга бир мақоласи тегиб кетган экан, хуллас Муҳаммад Солиҳнинг ҳассакашлари жавоб хатини уюштиришибди. Насабсиз хат муаллифига шоирдан қасос олишга онт ичирибди. ЎХҲнинг ҳозиржавоблигига  мен ҳам Ўҳҳў деб қўйдим...

 

Абдужалил Бойматов Ирландияда таржима ишлари билан шуғулланаётганмиш. Инглиз ва ўзбек  тилида яқинда сотувда Гулшан Қораева билан ҳаммуаллифликда ,,Газ йўқми,Свет йўқми" номли  жумбоқлар китоби пайдо бўлади.

 

Муҳаммадсолиҳ Абутов ҳам тинмай ижод қилмоқда. Швед ва немис киноижодкорлари суратга олишни режалаштираётган 386 қисмли сериалга сценарий ёзаётганмиш. Сериал болаларга мўлжалланган бўлиб, енгил эротик саҳналарга бой бўлармиш. Сериалнинг ишчи номи ,,Гулсумойнинг Интернетиядаги ғаройиб саёҳати" ...

Гулсумой (Хуршида) эса, Украина телевидениесида  ,,Аёлнинг қирқ макри"  номли ток -шоу ташкил қилаётганмиш...

Гугуша тахаллуси билан ижод қилаётган Гулнора Каримованинг синглиси Лола Каримова ҳам шоу бизнесда ўзини синаб кўрмоқчи экан. ,,Лоло" тахаллусини танлаган кичик Каримова опаси  билан ,, Қувноқ пингвинчалар" гуруҳини  ташкил қилиб , жаҳон бўйлаб гастролга тайёргарлик кўрмоқда деб хабар қилади исмини ошкор қилишни истамаган манба. Оқсаройдан, бошқа бир ишончли манбамизнинг(у ҳам исмини ошкор қилгиси келмади, камтарликка йўйдик) хабарига ишонсак, Ислом Каримов бу янги гуруҳнинг продюсери бўлармиш. Фақат бу билан чекланиб қолмасдан саҳнада  миллий рақсдан намуналар ижро қилиб турармиш. Бу гуруҳнинг ижодий фаолиятига омадлар тилаб қоламиз!

Юртимиздан олинган сўнгги хабарларга қараганда, Ўзбекистон парламентига порахўрликни тугатиш ҳақидаги қонунларни ишлаб чиқиш топширилган. Парламент бундан норози... Ва истеъфо бермоқчи...

Ўзбекистон Республикаси Давлат Автомобил Назорати ходимлари ватанпарварликда барчага ўрнак бўлмоқда. Яқинда ўтказилган ,,Сиз маошсиз ишлашга рози бўлармидингиз" мазмунидаги сўровномада қатнашган барча хизматчилар бир овоздан ,,албатта" деб жавоб берганмиш...

Лола Каримова шарофати билан Францияда Ислом Каримов оддийгина  ,,Диктатор " унвонини олган эди. Энди Гулнора Каримова бу судни судга бермоқчи. Нияти, отасини қаёқдаги Франциядагина эмас, бутун дунёда  ,,Энг Буюк Диктатор"  деб қонуний тан олдириш. Аризага овоз тўплаш бошланган, сиз ҳам четда қолманг. Ҳарҳолда Президентимиз обрўси бизнинг ҳам обрўмиз...

Шавкат Муҳаммад