Улар шундоқ ён қўшни эди. Болаликдан бирга ўсган, гарчи ёшларида икки-уч йил фарқ бўлса-да, бир-бирларини яхши тушунарди. Балоғат ёшига етгач, ҳаёт уларнинг тақдир йўлларини бирлаштирди. Ёшларнинг наздида оила, рўзғор, фарзандлар, инсон ҳаётининг унутилмас лаҳзалари бўлган ёшлик сурури каби буюк ва муқаддас неъматларнинг оғир синовлари ҳам бор эди. Улар ана шу синовларга дош беришолмади. Ҳатто, не-не орзу-умидлар билан дунёга келтирган фарзанди ҳам бу риштани сақлаб қололмади.
Рўзғор ташвишларини кўтаролмаган йигит аламини аёлидан олиш учун муштига зўр берди, хўрликлардан сабри тугаган жувон эса тилига. Қўшни қудалар ҳовлиси ўртасидаги пахса девордан очилган дарчага қайтадан ғишт теришди. Онасида қолган ўғил фарзанд эса ота ҳовлисига ўтиб турарди. Шундай кунларнинг бирида бола кўчани айланиб, ота ҳовлисига кирди. Туш вақти бўлишига қарамай, Ботир (боланинг отаси) болта билан хомғиштни йўниб ўтирганди. Бола отасига нимадир деди, у эса жаҳл билан қўлини пахса қилиб бақирди. Бола йиғлади, энди ортига бурилиб кетмоқчи бўлганди, важоҳат билан кириб келган Холиданинг оғзи ҳақорат қозонига айланди. Ичкилик таъсиридан бутунлай ихтиёрини йўқотган Ботир шахд билан турди-ю, собиқ хотинининг бўйнини мўлжаллаб, болтани зарб билан сермади. Бу даҳшатли воқеа шундоқ боланинг кўз ўнгида рўй берди. Ваҳшийликнинг бу кўринишини ҳар ким ўзича таҳлил қилса-да, ҳеч ким унинг туб илдизигача боришни истамади. Нима учун, ким айбдор, бунга йўл қўймаслик мумкинмиди, деган саволлар очиқ қолаверди. Жувон фоний дунёни тарк этди, қотил эса панжара ортига йўл олди. Шу билан бу фожиа оддий бир воқеа сифатида тезда унутилди.
Бугун эса ака-ука, ота бола билан ҳеч кимга вафо қилмайдиган бойлигу мерос ёки ўзи билан ҳеч қачон олиб юролмайдиган бир қарич уват устида ёқа бўғишса, калондимоғлик қилиб, бир ножўя сўз-ла ўзгаларнинг қалбини яраласа, унинг ҳам жазоси бор.
Бир куни яқин танишларимдан бири билан учрашиб қолдим. У негадир тажанг, қандайдир кўнгилсиз воқеа рўй бергану ҳамон таъсиридан қутулолмай, асабийлашиб турарди. Ҳозиргина кўз ўнгида содир бўлган воқеадан анча изтиробга тушганини айтиб берди.
Шаҳар марказий истироҳат боғи. Соат миллари кечки ўнларга яқинлашиб қолган бўлса-да, боғ ҳамон гавжум эди. Жамоат тартибини сақлашга масъул бўлган ички ишлар ходимларидан уч-тўрт нафари ҳар ер-ҳар ерда тўпланиб турганларга вақт кеч бўлганини, энди боғ ёпилишини тушунтириб боришарди. Шу пайт аттракцион ўйинлар олдида турган "Ласетти"дан бир тўп ёш-яланг (жудаям ёш эмасди, балоғат ёшидаги йигит-қизлар) тушиб, аттракцион ўриндиқларига ўтиришди. Икки-уч айланганча милиция ходимлари кутиб туришди.
— Укалар, энди вақт бўлди, уй-уйларингга тарқалинглар, эртага бемалол яна мириқиб ҳордиқ чиқарасизлар, — дея ётиғи билан тушунтиришди аттракцион тўхтагач.
— Ҳов, сен кимга гапираяпсан, биз дам олгани келганмиз, халақит бермай сурингларчи, — лабининг бир четига сигарет қистириб олган йигит дағдаға қилди.
— Тушунинглар, белгиланган тартиб бор, биз шунга риоя қиламиз, сизлар ҳам бўйсунишларинг керак.
— Ҳе сенга форма кийдирганни...
Очиқдан-очиқ ҳақоратга ўтган ғўла йигит милиционерлардан бирининг формасига қўл чўзди.
Қаёқдандир пайдо бўлган уч-тўрт нафар ўрта ёшдаги хотин-халаж бу тортишувга аралашиб, ички ишлар ходимларини бепарда сўзлар билан ҳақорат қилишга тушиб кетдилар. Қўшимча куч чақирилди. Аёллардан бири кимгадир қўнғироқ қилди. Жанжалкашлар беписандлик билан машиналарига ўтирганча, боғни тарк этишди. Бизнинг тинч яшашимиз, фарзандларимиз, оиламиз бағрида хотиржам бўлишимиз учун кунларни тунларга улаб, ҳаловатидан кечиб, зарур бўлса, ҳаётини гаровга қўйиб қўриқлаётган қалқонларимизга бўлган бундай муомала, муносабатдан изтиробга тушасан киши. Аминманки, орган ходимларига нисбатан ҳурматсизлик қилган бу ёшлар, оқ-қоранинг фарқига бориб қолган аёллар оддий одамларни хасчалик ҳам тан олишмайди. Бундай оилада, муҳитда тарбия топаётган фарзандлардан нима кутиш мумкин? Бу масалани асабларни бузмай, кескинликка бормай, хушмуомалалик билан ҳал этса бўладику! Жамоат тартибини сақлаш қоидаларига риоя қилишга барчамиз тенг дахлдормиз.
Калондимоғлик, менсимаслик, айримларга паст назар билан қараш каби чин инсонга хос бўлмаган иллатлар кўп ҳолларда энди ўсиб келаётган фарзандлар тарбиясига катта салбий таъсир кўрсатади.
Яқинда аянчли бир воқеанинг гувоҳи бўлдим. 12-13 ёшлардаги мактаб ўқувчисининг ҳайратланиб айтган сўзларидан очиғи, хижолатга тушиб қолдим.
Катта кўча. Машиналарнинг тинимсиз қатнаб туриши пиёдалар учун бироз ноқулайлик туғдирса-да, белгиланган ўтиш йўлагида эҳтиёткорлик талаб қилинади. Чунки, айрим машиналар, айниқса, сариқ рангли таксилар жуда шошилганларидан пиёдалар йўлагига унчалик эътибор қаратишмасди. Қўлида сумкаси билан пиёдалар оқимига қўшилиб кетган мактаб ўқувчиси бемалол йўлакдан ўта бошлади. Шу пайт "Матиз"нинг илкис тормоз бергани ва чийиллаган овози пиёдаларни ҳушига келтирди. Қўрққанидан ўзини батамом йўқотиб қўйган ўқувчи қизни уч-тўрт киши йўл четига олиб чиқди. Кимдир сув тутди, "Матиз" эгаси эса болани туртиб юбормаганига ишонч ҳосил қилгач, яна машинасини елдириб кетди. Ҳатто нима бўлгани билан қизиқмадиям. Ҳушига келган жабрланувчи ўта самимият, соддалик билан ҳайратга тушганча, томошаталабларни ҳам чуқур ўйга толдирадиган шундай сўзларни айтди:
— Устозларимиз мактабда ҳар куни "кўчада юрганда эҳтиёт бўлинглар. Йўл қоидаларига ҳар доим амал қилинглар, светофорнинг яшил чироғи сизларники, фақат шуниси ёнганда йўлни кесиб ўтинглар, пиёдалар йўлагидан ўтинг, бу жойлар оқ ранг билан белгилаб қўйилган, шуларга амал қилсаларинг, ҳеч қачон йўл-транспорт ҳодисасига дуч келмайсизлар, бу қоидаларга ҳайдовчилар ҳам бўйсунишади", деб уқтиришарди. Мана, белгиланган жойдан ўтсаям машина уриб кетиши мумкин экан-да. Ё йўл қоидалари шофёрларга тегишли эмасмикан-а?
Мактабда обдан қулоғига қуйилган тартиб-қоидаларнинг кўчада аксига дуч келган мактаб ўқувчисининг саволига нима деб жавоб бериш мумкин?
Эсимда, ҳали бола эдик, шундай бўлса-да, айрим воқеалар хотирамда бир умрга муҳрланиб қолган. У пайтлар шифер қилинмаган пастак уйлар лойсувоқ қилинарди. Ҳар йили кузнинг биринчи ойи қишлоқда лой ҳашар бўларди. Ўттиз-қирқ уйнинг томида фақат Ниёз бобо андава тортарди. У киши келмагунча, ҳеч ким иш бошламасди. Чунки Ниёз бобо томнинг обдовини яхши оларди, сув тўпланиб қолмасди, ҳар қандай ёғин-сочинли кунлардаям томдан чакка ўтмасди. Энг муҳими, ишнинг кўзини биладиган, ҳунарли,ғилофлик қилмайдиган ҳалол инсонларга нисбатан ҳурмат-эътибор кучли эди. Ўн-ўн беш кун давом этадиган ҳашарда бутун қишлоқ аҳли қатнашарди. Атайлаб ҳашарга айтилмасди, ўзлари навбати билан сувоқ қилиб кетаверишарди. Қишлоққа бир меҳмон келса, бир ҳафта, ўн кунлаб ижозат берилмасди, ҳамма хонадон таклиф қиларди.
Бугун-чи, данғиллама ҳовли-ю, қўша-қўша машинаси борлар ўз жигарларидан кўнгил сўрашга ярамай қолаяпти. Йиллар давомида ўсал ётган отанинг икки кўзи йўлда, фарзанд эса тижоратдан бўшамайди. Долларнинг бозор нархини ҳар соатда сўраб туришга вақт топади-ю, ҳамон фарзандига мартаба тилаб, қўллари дуода бўлган онаси эсига келмайди.
Тўғри, даврнинг шиддатли оқими ҳар биримизни ўзига бўйсундиради. Хоҳлаймизми-йўқми, оқим бўйлаб сузамиз. Лекин қон-қонимизга сингдирилган, қалбимизга муҳрланган, миллатимиз, халқимизга хос бўлган фазилатлар, муқаддас туйғулар соҳилда қолаётгани йўқ-ку. Ахир, қалбимиз ҳам ўзимиз билан бирга-ку.
Сизга нима бўлди, одамлар?!
Исроил ХОЛБОЕВ,